VIGAN CITY – Idauluan ni President Ferdinand Marcos Jr. ti pananglagip ti maika-126 nga anibersaryo ti Philippine Independence Day ita nga aldaw, June 12, 2024.
Idauluan ni Marcos ti flag-raising ceremony ken wreath laying iti Rizal Park idiay Manila.
Segun ti National Historical Commission of the Philippines, maangay ti Simultaneous flag-raising ceremony ken wreath laying idiay Kawit, Cavite; Malolos City, Bulacan; San Juan City; Manila North Cemetery; Caloocan City and Angeles City, Pampanga.
Ti vin d’honneur wenno pormal a panangawat kadagiti diplomatiko ket tradisional a maangay kabayatan ti Independence Day.
Maangay ti Parada ng Kalayaan 2024 iti malem, a pakaitampokan ti 22 a float a mangiladawan kadagiti kangrunaan a pasamak iti pakasaritaan, ken agpabuya ti Filipino girl group a BINI kalpasan ti parada.
Maipalagip nga inallukoy ni President Marcos idi Domingo dagiti Pilipino a mangrambak iti anibersaryo ti Philippine independence, ken impasiguradona iti agtultuloy a panandepensa ti gobierno ti wayawaya ken soberanya ti pagilian.
