Dinutokan ni Presidente Ferdinand R. Marcos Jr. ni Department of the Interior and Local Government (DILG) Secretary Juanito Victor “Jonvic” C. Remulla Jr. a mangsuspenso ti trabaho ken klase bayat ti saan a nasayaat a paniempo ken dadduma pay a didigra.
Segun ken ni DILG Sec. Remulla, Jr., kiniddawna ken ni Presidente Marcos, Jr. ti panagdeklararna ti kanselasion wenno panagsuspenso ti klase no adda bagyo gapo ta naparpardas ti koordinasion nga aggapo iti ahensia kas kapadasanna idi gobernador pay isuna.
Pinasingkedan ti DILG a ti class suspension ket mabalin latta nga ipatungpal ti Department of Education (DepEd) ken dagiti lokal a gobierno wenno Local Government Units (LGUs) depende iti sitwasion iti masakopanda.
Impasigurado ni Remulla a Vice Chairperson for Disaster Preparedness iti National Disaster Risk Reduction and Management Council (NDRRMC) iti publiko a mairuar ti pakaammo iti rabii sakbay ti aldaw a pannakaiyetnagna a kas iti araramidenna idi gobernador pay laeng idiay Cavite.
