Nakasagana ni President Ferdinand Marcos Jr. a dumalan iti imbestigasyon maipanggep ti report ti Philippine Center for Investigative Journalism (PCIJ) a mangibagbaga a nakaawat isuna iti P21 million amnipod iti Rudhil Construction and Enterprises para iti kampaniana idi 2022.
Segun ken ni Palace Press Officer Claire Castro, saan nga agilimlimed ti presidente ken silulukat iti pannakaidalan ti aniaman a proseso iti imbestigasyon nu mairaman ti naganna.
Kinuna ni Castro a natured ti presidente ken natalek a nadalus iti naganna babaen ti pormal a proseso iti imbestigasyon.
Impaganetget ni Castro a nalawag ti posisyon ti presidente nga awan iti siasinoman, uray isuna pay iti rumbeng a maiyadayo iti linteg wenno iti aniaman a panagdenggeg maipanggep iti korapsyon.
