Nagpakita manen ni President Ferdinand Marcos Jr. idiay Malakanyang ta dimmar-ay iti ceremonial submission iti final report iti Second Congressional Commission on Education (EDCOM 2) idi kalman, kalpasan iti sumagmamano nga aldaw a panag-absent-na kadagiti aktibidad gapu iti panagsakitna.
Ti final report ket mangdedetalye ti tallo a tawen a naduktalan iti agdama a kasasaad iti edukasyon iti Pilipinas iti EDCOM 2.
Inawat ni Pres. Marcos ti National Education and Workforce Development Plan (NatPlan) 2026-2035, maysa a legislative ken executive a tulagan a nadisenyo tapno matarabayan dagiti maipangruna a reporma, linteg ken alokasyon iti budget para iti sumaruno a sangapulo a tawen.
Maipalagip nga idi rabii iti January 21 ket na-ospital ti presidente gapu iti diverticulitis isu a saan a nakadar-ay kadagiti aktibidad ngem imbagi isuna da Executive Secretary Ralph Recto ken House Majority Leader Sandro Marcos.
Kinuna ni Recto a nasayaat iti kasasaad ti presidente ngem kasapulanna laeng nga aginana.
Kabayatanna, kimmuttong ti presidente ta puro sabaw laeng iti ipapaunegna iti naglabas nga aldaw.
