Manamnama a makitaripnong ni Pres. Ferdinand Marcos Jr. ken ni Russian President Vladimir Putin iti ASEAN-Russia Summit idiay Kazan, Russia inton June 17 agingga 18 kas pinasingkedan ni Russian Foreign Affairs Minister Sergey Lavrov.
Segun ken ni Lavrov, manamnama a dumar-ay ni Marcos iti taripnong kas paset iti panagrambak iti maika-limapulo nga anibersaryo iti diplomatic relations iti Pilipinas ken Russia, no man pay awan ti opisyal a kumpirmasyon manipod Malakanyang.
Karaman iti mapagpapatangan iti panangpalawa iti kooperasyon iti trade, panagpuonan, enerhia, agrikultura, science and technology, edukasyon, turismo ken dadduma pay a biang kagiddan ti kalikagum iti Russia a papigsaen ti kammayetda iti ASEAN sakbay iti panangidaulo ti Pilipinas iti organisasyon ita a tawen.
Maipalagip a namindua a daras a nakitaripnong ni Putin ken ni dati a Pres. Rodrigo Duterte idi agtaktakem pay laeng, a segun ken ni Lavrov ket maysa a napateg a kontribusyon dayta iti panangyatiddog ti kooperasyon iti nagbaetan ti Pilipinas ken Russia.
