VIGAN CITY – Imbilin ni President Ferdinand Marcos Jr. nga iraman dagiti masikog ken agpaspasuso nga ina kadagiti benepisiaryo ti Pantawid Pamilyang Pilipino Program (4Ps).
Ti bilin ket impaay ti presidente iti National Economic and Development Authority (NEDA), Department of Social Welfare and Development (DSWD), Department of Health ken dadduma pay a maseknan nga ahensya.
Segun ken ni President Marcos, ti addang ket tapno masigurado ti nasayaat a salun-at dagiti maladaga.
Inaprubaran pay ti presidente ti singasing ti DSWD ken binilinna ti ahensia a kadua ti NEDA nga i-finalize nu manu ti rumbeng a panagngato iti nayon a suporta.
Iti agdama a programa, umaw-awat ti 4Ps beneficiary-family iti daycare ken elementary grant a P300 tunggal ubing iti kada bulan iti las-ud ti 10 a bulan; P500 tunggal ubing kada bulan iti las-ud ti sangapulo a bulan para iti junior high school ken P700 tunggal ubing kada bulan iti las-ud ti sangapulo a bulan, idinto a P750 iti kada bulan iti aw-awaten ti tunggal household iti uneg ti maysa a tawen para iti growth development ken monitoring dagiti ubbing nga agtawen iti dua agingga sangapulo ket uppat.
