Dagus a nagideploy ti Philippine Red Cross (PRC) kadagiti rescue ken assistance teams a tumulong iti panagbakwit ken nagiwaras iti face mask kadagiti komunidad a naapektaran iti panagngato ti Alert Level 3 ti Bulkan Mayon.
Nangrugi ti panagbakwit iti Barangays Anoling ken Quirangay iti Camalig, Albay, idi kalman bayat nga agsagsagana met ti lokal a gobierno ti Tabaco para iti posible a panagbakwit.
Inlawlawag ti PRC nga awanen ti kasapulan nga ibakwit dagiti pamilya manipud Malilipot gapu ta naiyakar metten dagiti agindeg idiay iti natalged a lugar.
Inallukoy ti PRC kadagiti umili iti uneg ti innem a kilometro a danger zone a surotenda dagiti balakad maipapan iti panagbakwit, mangisagana kadagiti nasken a banag, agusar da iti face mask kontra iti panagtinnag ti dapo, ken liklikan dagiti danger zone.
