Maysa nga agindeg ti Barangay Poblacion East, San Ildefonso ti nakaawat iti tawag manipud iti maysa a saan pay nabigbig nga indibidual a nagpayam-ammo kas miembro ti New People’s Army ken agkidkiddaw iti P8,000 a pinansial a suporta iti grupoda.
Ti biktima ket lalaki nga agtawen iti uppat a pulo ket lima, agnaed iti nasao a barangay.
Naawat ti biktima ti tawag iti alas otso bainte y singko iti rabii ti Hulyo 12, ket rumrummuar iti cellphone-na a ti numero a timmawag ket “potential spam caller.”
Gapu dayta, nagkiddaw ti biktima iti naan-anay a pakabigbigan ti timmawag ngem nagbalin nga agresibo daytoy ket saan a nangted iti ania man nga impormasion ken iniddepna ti tawag.
Awan ti impatulod a kiarta ti biktima ken saanen a timmawag pay ti caller.
Nupay kasta, dagus a nangiruar iti Flash Alarm ti Ilocos Sur Police Provincial Office kadagiti amin a police station tapno maipakaammo ti pasamak ken mabantayan ti nasao a numero.
