Umuna iti listaan ti Philippine Ports Authority (PPA) kadagiti ahensia ti gobierno a pilpilien dagiti Filipino job seekers, maibasar iti Employee Job Happiness Index 2024 ti Jobstreet.
Segun iti PPA, mangipakpakita daytoy ti dedikasionda a mangipaay iti inclusive, dynamic, ken growth-oriented workplace a mangal-allukoy kadagiti talento dagiti Pilipino.
Basar iti survey, sapsapulen dagiti job seekers ti flexibility iti work schedule, reputasion ti kompania, ken dagiti shared values da.
Dayta ti gapuna nga agtultuloy nga ipatpateg ti PPA ti panagdur-as dagiti empleadoda babaen kadagiti programana kas iti scholarship programs ken training.
Idi tawen 2023, nasurok nga 400 nga scholarship, local ken international, ti naited tapno mapalawa ti pannakaammo ken paglaingan dagiti empleado ti PPA.
Inpakaammo ni PPA General Manager Jay Santiago, bayat nga agtultuloy ti panangpapintas ti ahensiada kadagiti pantalan, agin-invest da met kadagiti empleadoda gapu ta isuda ti tulbek ti panagdur-as da.
