VIGAN CITY – Maka-ammo lattan iti gobyerno nu mapaway-wayan wennu saan iti naiyetnag nga enhanced community quarantine iti intero a Luzon gapu iti covid-19, dayta iti bugas iti panagsarita ni Buhay Partylist Rep. Lito Atienza iti pannaki-uman kenkuana ti Bombo Radyo Vigan iti kangitingitan dagiti agwarwaras a damag a sumagmamano kadagiti pada na a kongresista iti mangitantandudo iti extension ti enhanced community quarantine tapnu naan-anay a maparmek iti panagraira iti nasao a sakit.
Ingunam-gunam ni Atienza a saan da a miyembro ti Executive Department isu nga awan iti karbengan da a diktaran iti presidente nu anya iti masapul nga aramiden na ta adda met dagiti katulungan na nga agdesisyon iti nasao a banag kas kadagiti miyembro ti Inter-Agency Task Force pakairamanan dagiti Local Government Unit ken Department of Health.
Mainaig dayta, kiniddaw ni Atienza a maysa laengen nga ahensya iti paggapuan ti damag tapno saan a maulaw dagiti tattao kadagiti madamdamag da inaig iti enhanced community quarantine.
Innayon na met a nu adda pannakabalin na ket kwarta lattan iti maited kadagiti tattao a tulong kadakuada ta adda dagiti sumagmamano nga umili a saan da a kayat dagiti naited kadakuada a relief packs ket agsapul da pay iti sabali.
Mamati ti kongresista a napinpintas nu kwarta iti maited kadagiti umili ta maka-ammo dan a gumatang kadagiti kangrunaan a kasapulan da.
