Inyatiddog ti grupo dagiti agtartaraken iti baboy ti Pork Holiday-da a nangrugi idi Oktubre 22 iti maysa pay nga aldaw tapno kiddawenda ti dagus a pannakaipatungpal ti temporary import ban ti karne ti baboy ditoy pagilian.
Segun kenni AGAP Party-list Representative Nicanor Briones, ti panggep ti kiddaw ket tapno matulongan dagiti lokal a hog-raisers a makabangon iti pannaka lugi da a gapuanan ti iseserrek dagiti imported a karne ti baboy ditoy pagilian.
Isingasing ti grupo nga agpaot iti uppat agingga iti lima a bulan ti import ban ken masakupan ti amin a paset ti karne ti baboy tapno malapdan met ti technical smuggling.
Impakdaar dagiti agtartaraken iti baboy a mabalin a dumanon iti binilyon a pisos iti lugi da ken mabalin a mapilitan nga agserra ti sumagmamano a negosio a mainaig iti industria iti sumaruno nga innem a bulan no awan ti dagus a solusion.
Mabalin met nga apektaran na ti suplay ken presio ti karne ti baboy, isu nga nagpanawagan ti grupo iti gobierno nga ipangpangruna da ti pagimbagan dagiti lokal a hog-raisers.
