VIGAN CITY – Kagiddan iti selebrasyon iti Family Planning Month ket pinasingkedan ti maysa nga OB-Gynecologist a nasurok pitogasut a ribo (700,000) iti populasyonen iti Ilocos Sur.
Iti pannaki-uman ti Bombo Radyo Vigan ken ni Dr. Glenda Rabino, maibasar iti listaan ket kangatoan iti populasyon iti siudad ti Candon, sumaruno ti siudad ti Vigan ken ili ti Narvacan.
Patta-pattaen ti doktora a ngimmato iti duagasut a ribo (200,000) a populasyon iti uneg laeng iti dua a tawen isu nga inyunay-unayna iti kinapateg ti panangkontrol kas iti panagaramat ti contraceptive tapno saan a marigatan dagiti tattao.
Nu kumaru pay iti panagado ti populasyon ket mabalinna nga apektaran a kas iti ekonomia iti pagilian.
Inlawlawagna a nasaysayaat nu kalpasan ti tallo agingga lima a tawen ti panagsikog manen ti maysa a babai tapno maliklikan nga agrisgo ti salun-at ken umado a populasyon ket adda iti tallo a klase wenno wagas tapno makontrol iti panagsikog nga isu iti natural, artificial ken permanent.
Segun ti doktora, kalatakan iti natural family planning ta kasapulan laeng nga amwen iti senyales ken sintomas iti fertility bayat ti menstrual cycle tapno maliklikan ti panagsikog dagiti babbai.
Kinunana a ti artificial method ket isu iti panagaramat ti pills ken contraceptive injection (depo) wenno kombinasyon ti pills ken injection kasta pay nga adda iti permanente a wagas nga isu iti maawagan a ligate para kadagiti babbai idinto a vasectomy kadagiti lallaki.
