Pondo iti ili ti Narvacan, saan a gulpe a maaramat

Vigan City – Inlawlawag ni Narvacan Mayor Luis Chavit Singson a masagsaganaan dagiti posible a pagkasapulan iti masangwanan isu a saan nga amin a pondo ket gulpienda nga aramaten.

Segun kenni Mayor Singson, rumbeng nga adda ti nakasagana a pondo no man bilang kumaro iti covid-19 ken tapno saan a marigatan dagiti umili.

Pinasingkedan ni Singson a nakatutok amin a mayor iti tunggal ili ditoy probinsia a mangkita no ania dagiti pagkasapulan wenno parikut iti masakupanda tapno ammoda met la ti naan-anay a pondo a mailatang.

No pay kasta, ingunamgunam ti mayor iti panagtitinnulong ti tunggal maysa tapno maliklikan ti COVID19 ket kunana a ti tunggal maysa ket kasapulan a disiplinado.