Nadiskubre dagiti kameng ti Pampanga Police ken local officials ti underground tunnel iti naisayangkat a panagtakkuat iti exclusive resort nga inaramat dagiti Chinese bosses iti POGO idiay Bamban, Tarlac ken Porac, Pampanga.
Segun ken ni Pampanga Police Provincial Director Police Col. Jay Dimaandal, ti compound ket idiay Barangay Siñura, Porac, Pampanga a nakurang lima a kilometro manipod kadagiti opisina a na-raid a POGO hub ti Lucky South 99 Outsourcing Inc idi napan a bulan.
Kinuna ni Pampanga Governor Dennis Pineda, napagtipon ti tunnel ti mansion ken pagtaengan iti tengnga ti maysa a lagoon.
Iti panagsukimat dagiti otoridad ket nasarakanda ti underground hallway nga adda empty shelves-na ken nasarakan dagiti opisina ken bedroom.
Ti bedroom ket addaan ti glass sliding door a mapan iti bassit a lagoon a mamagsina kadagiti kuarto manipod dadduma a paset ti compound.
Saanen nga impakita pay dagiti otoridad ti firing range ken mapapati a nakitada pay ti torture devices ken incriminating documents.
Nakemmeg dagiti occupants iti compound ken dua nga incorporators iti Whirlwind Corporations, kompania nga agpapaabang idiay Barangay Sta. Cruz iti Lucky South 99.
Innayonda nga awan ti barangay clearance para iti construction iti compound.
