VIGAN CITY – Kiniddaw ti Philippine Olympic Committee kadagiti kritiko a saan da pay a ririboken iti panagsagsagana iti pagilian iti panangsangaili ti 30th Southeast Asian Games.
Dayta ket inaig pay laeng iti kontrobersyal a stadium cauldron a mausar inton SEA Games a nakagastoan iti gobiyerno ti lima pulo a milyon a pisos nga ibilang dagiti kritiko nga overpriced.
Ti pannaki-uman ti Bombo Radyo Vigan ken ni POC President- Cavite Rep. Abraham “Bambol” Tolentino, nadakamat na nga urayen kuma dagiti kritiko a malpas iti biennial meet sakbay nga agsao da ken dillawen da amin a makita da nga anomalya inaig iti panaghost iti pagilian ti SEA Games.
Kagiddan iti dayta ket inpatangken ni Tolentino a saan a nangina unay iti nasao a cauldron agsipud ta iti nasao a banag ket obra maestra ti maysa a national artist.
Kinunana, nalaklaka pay iti ginastos iti gobierno para iti pannaka-aramid iti nasao a cauldron nu iyarig ti innem a pulo ket dua a milyon a pisos a ginastos ti Singapore para iti cauldron a naaramat idi naghost da ti SEA Games idi 2015.
