Awan ti maipagarup nga impadamag ni Vice President Sara Duterte iti Philippine National Police (PNP) nga aniaman a pangta iti biag na wenno kinatalged ti pamilia na, pakairaman dagiti pangta nga imbaga na a naawat na pay manipud idi tawen 2023.
Pinasingkedna ni PNP Chief Gen. Jose Melencio Nartatez Jr. nga awan pay ti namonitor ti PNP a beripikado a pangta kontra iti bise presidente ken ti pamilia na.
Nupay kasta, nakalukat ti PNP iti panagawat ti aniaman a dokumento, damag wenno statement dagiti naipadamag a pangta tapno masukisok ken maberipikar dagituy.
Kasaruno daytoy ti statement ni VP Sara mainaig iti buteng na para iti kinatalged na kalpasan a napan iti Quezon City Regional Trial Court idi kalman, Setyembre 5, tapno agpiyansa iti tallo a bilang ti grave threats.
Pinasingkedan pay ti ahensia a nagted da ti security assistance iti panagsango ni Duterte iti korte ken natalged a napan ken nakapanaw isuna.
