Agbinnulig ti Philippine National Police, Department of Trade and Industry ken dagiti lokal a gobierno iti nainget a pannakaipatungpal ti innem a pulo nga aldaw a price freeze kadagiti kangrunaan a produkto idiay Davao Oriental kalpasan ti nagsaruno a gingined a dimmuprak iti nasao a probinsia idi napan a lawas.
Segun ken ni PNP Chief Police Lt. Gen. Jose Melencio Nartatez Jr., daytoy ket tapno masigurado a maaywanan dagiti umili nga apektado iti didigra kangrunaan iti panangpatalinaed iti urnos, natibker a supply chain ken panangliklik iti panaggundaway iti panawen ti krisis.
Gagem ti presensia ken koordinasion ti kapulisan a mapagtalinaed ti kappia ken urnos kadagiti naapekataran a lugar.
Maipalagip nga immunan nga inwaragawag ti DTI ti panangipatungpal iti automatic price freeze nga epektibo manipud October 13, 2025 agingga December 12, 2025 tapno masigurado nga stable ken magtengan ti presio dagiti kangrunaan a kasapulan ken produkto iti panawen a bumangbangon pay laeng dagiti agindeg manipud iti epekto ti gingined.
