Target ti Philippine National Police a maragpat ti “zero crime rate” inton Semana Santa babaen iti pannakitinnulongda kadagiti opisial ti barangay iti intero a pagilian.
Segun ken ni PNP Chief Gen. Jose Melencio Nartatez Jr., nabilinen dagiti amin a police commander a naing-inget a makibinnulig kadagiti kameng ti barangay tapno masigurado a maipatungpal a nasayaat dagiti plano para iti kappia ken kinaurnos.
Impaganetget ni Gen. Nartatez a dagiti barangay unit ti agserbi a “first line of defense” tapno mapapigsa ti presensya dagiti otoridad ken mapaalisto ti panangrisut iti ania man a pasamak.
Daytoy a panagsagana ket paset iti nalawlawa a kampania a “Ligtas SUMVAC 2026” a nairusat idi umuna a paset ti Marso.
Gagemna daytoy a mabantayan ti seguridad dagiti umili iti intero a panawen ti summer break manipud Marso 29 agingga Mayo 31.
