Rinugianen ti Philippine National Police ti sumuporta ken tumulong iti madama nga imbestigasion ti Independent Commission for Infrastructure mainaig iti mapapati nga anomalya kadagiti flood control project iti pagilian.
Babaen iti Criminal Investigation and Detection Group ken dagiti Regional Field Units, tumulong ti PNP iti panangala iti dokumento ken panangsigurado iti seguridad ti ICI inspector kadagiti naisayangkat a field validation idi September 25, 2025.
Segun ken ni PNP acting chief Police Lt. Gen. Melencio Nartatez Jr, aktibo nga agal-ala ti CIDG kadagiti dokumento manipud kadagiti DPWH regional office, agraman dagiti certified true copy tapno maaywanan ti ebidensia.
Naipasigurado met ti seguridad dagiti engineer ken inspector a mangisaysayangkat iti material testing ken site visits, tapno masigurado nga agtultuloy ti imbestigasion.
