Pinabileg pay ti Philippine National Police ti panagbantayda kadagiti gas station kalpasan a maawat dagiti report nga adda sumagmamano a paggasolinaan ti nagsardeng ti bukodda nga operasion iti baet ti agtultuloy a krisis iti produkto-petrolyo.
Segun ken ni PNP Chief PGen. Jose Melencio Nartatez Jr., dagusna a binilin dagiti hepe ti kapulisan a dagus a makikammayet kadagiti lokal a gobierno ken uray iti Department of Energy tapno ammuen dagiti posible a rason iti biglaan a panagsara dagiti nasao a gasaolinaan.
Innayonna a no maysa nga illegal scheme wenno panaggundaway ti rason ti biglaan a panagsara dagitoy, manamnama ti dagus a panagtignay dagiti kapulisan.
Maipalagip nga immunan a nagkiddaw iti tulong ti Energy Department iti kapulisan para iti panangtiliw kadagiti gas station a manggungundaway iti sitwasion iti Middle East.
