VIGAN CITY – Nangpatakder iti pagtaengan dagiti kameng ti Sta Lucia Municipal Police Station ti para ti agina nga agindeg ti nasao nga ili iti salinong iti Project Bayanihan: Bagong Bahay Tungo sa Bagong Pag-asa.
Iti pannaki-uman ti Bombo Radyo Vigan ken ni PMaj. Rodel del Castillo, OIC iti Sta. Lucia MPS, inisyatibo ti panagpatakderda iti pagtaengan ta napagtutulagan dagiti personnel iti panangtulongda ti agina a da Pacita ken Edilberto Almazan ta bayat iti panagpasyarda iti lugar ket nakitada iti kasasaadda.
Segun ken ni del Castillo, idi nakapagsasaritadan ket insayangkatdan iti panag-uror para iti magastos iti panagpatakder ket pagyamananna ta adu iti naayat a timmulong.
Pinasingkedanna pay nga awanen iti kakabagyan dagiti dua ket awan iti sabali a pangnamnamaanda ken adda pay iti sagubanit ni Pacita isu a rumbeng laeng a matulonganda.
Narugianan ti pannakaipatakder iti proyekto idi November 30 agingga December 19.
Kabayatanna, kagiddan iti isyu iti pammaltog ti maysa a pulis idiay Paniqui, Tarlac ket nagpanawagan ni del Castillo ti publiko a saan koma a pagpapadaen iti intero nga organisasyon ta adadu latta iti pannakabagi ti linteg nga araramidenda a nasayaat iti trabahoda.
