Pinapigsa ti Philippine National Police (PNP) ti operasyon kontra iti peke a donation drives iti social media bayat nga agtultuloy iti relief efforts para kadagiti biktima ti Bagyo Opong.
Imbilin ni PNP Acting Chief Lt. Gen. Jose Melencio Nartatez Jr. iti Anti-Cybercrime Group (ACG) a bantayan dagiti makapadudua a panawagan a donasyon iti social media ken i-verify tapno maliklikan iti pannakagundaway dagiti tumultulong.
Segun ken ni Nartatez, masapul nga adalen ti ACG dagiti website ken e-wallet transactions tapno maammoan ken makemmeg dagiti scammer a manggungundaway dagiti kayatna iti tumulong kadagiti nadidigra iti bagyo.
Binalakadanna pay amin a kitaen dagiti opisyal a pakaammo, verified social media accounts, ken official bank accounts ket liklikan iti personal accounts nga agkidkiddaw iti donasyon nangruna nu saan a mapaneknekan ti impormasyon.
Adda pay ti nairusat nga awareness campaign iti PNP tapno surwan iti publiko nu kasano a maduktalan ti pudno ken peke a donation drive.
Inallukoy ni Nartatez dagiti nabiktima nga insigida nga ag-report iti ACG wenno kaasitgan a PNP station.
