Inallukoy ti Philippine National Police dagiti motorista nga agbalin a naannad no makaawatda kadagiti mensahe a mangibagbaga nga adda pakainaiganna kadagiti panaglabsing iti trapiko wenno dagiti pakaammo iti panagbayad.
Dayta ket kasaruno ti report dagiti scammer nga agipatpatulod iti peke a text message mainaig iti No Contact Apprehension Policy (NCAP).
Kagiddan dayta, binilin ni PNP Chief General Jose Melencio Nartatez Jr. ti Anti- Cybercrime Group (ACG) a pabilgen ti panagbantay kadagiti iligal nga aktibidad nga adda pakainaiganna iti NCAP.
Makikammayet payen ti PNP iti Metropolitan Manila Development Authority (MMDA) ken dadduma pay a maseknan nga ahensia tapno makatulong iti panang-secure kadagiti sistema a maar-aramat para kadagiti transaksion ken serbisio nga adda pakainaiganna iti nasao a polisiya.
Palagip ti PNP, a saan a dagus nga agi-click kadagiti makapadudua a links tapno maliklikan ti pannaka-scam no adda panaglabsing kadagiti otorisado nga online platform, kas ti eGovPH application ti gobierno ken dagiti online service nga ipapaay ti MMDA.
