Nakasagana ti Philippine National Police nga aywanan dagiti botante a Pilipino, dagiti opisial ti Commission on Elections, dagiti mangisursuro kadagiti presinto, ken dagiti grupo ti civil society a makitintinnulong iti gobierno tapno masigurado a nadalus, nakappia, ken napudno ti midterm elections inton Mayo 12, 2025.
Impaganetget ni PNP Chief Police General Rommel Francisco Marbil ti kinasagana ti kapulisan a mangaramat iti resources-da tapno masigurado a dagiti Pilipino ket makabotos nga awan butengna, nangruna kadagiti maibilang a hotspot area.
Ti addang ket maisurot iti pammilin ni Presidente Ferdinand Marcos Jr a masigurado ti nakappia nga eleksion nangruna iti Bangsamoro Autonomous Region in Muslim Mindanao, nga iti kallabes ket nakapadas iti kinaranggas mainaig iti eleksion.
Saan met a nabab-baba ngem iti 34 ti election hotspot iti intero a pagilian, 27 ti masarakan iti BARMM.
