Nakaalan ti Philippine National Police iti DNA sample manipud kadagiti sangapulo ket dua a kabagyan dagiti mapukpukaw a sabungero tapno maiparis kadagiti rurog ti tao a nasarakan iti Taal Lake.
Segun ken ni PNP spokesperson Brig. Gen. Jean Fajardo, no agpadanto ti sample dagiti naala a DNA kadagiti nasarakan a rurog, mapaneknekanton a natayen dagiti mapukpukaw a sabungero.
Maipalagip nga idi napan a bulan ket imbutaktak ni alyas Totoy wenno ti whistleblower a ni Julie ‘Dondon’ Patidongan, a dagiti tallopulo ket uppat a mapukpukaw a sabungero ket naiwalang iti nasao a dan-aw idiay Batangas.
Ni Patidongan ti maysa kadagiti innem a security guard a napabasul a nangdukot kadagiti sabungero.
Imbutaktakna pay nga isuda ti nangigalut kadagiti biktima sakbay ti pannakaiwalangda.
