Nainget a bantayan ti Philippine National Police ti kappia ken seguridad iti tallo nga aldaw a transport strike kadagiti dua a dakkel a transport group iti Metro Manila ken kadagiti kabangibangna a probinsia.
Dayta ti impasigurado ni PNP chief Police Lt. General Jose Melencio Nartatez Jr., kasaruno ti mapaspasungadan a tigil-pasada ti grupo a Manibela inton Setyembre 17 agingga 19 idiay Metro Manila, idinto a Setyembre 18 met ti Piston idiay Metro Manila ken kabangibangna a probinsia.
Segun ken ni Nartatez, raemenda ti arungaing dagiti transport group nga yebkas ti kaririknada ngem kalikagumda a masigurado ti kappia ken kinaurnos nangruna kadagiti lugar a pakapaspasamakan ti kinaranggas kontra kadagiti tsuper a saan a sumurot iti tigil-pasada.
Binilin ti PNP chief dagiti police commander a pabilgen ti police visibility kadagiti lugar a pakaangayan ti protesta.
