Nainget a pinaglibakan ti Philippine National Police (PNP) ti alegasion nga adda “grand conspiracy” iti ranggoda.
Daytoy ket kalpasan a napilaan ti kaso dagiti tallopulo a polis gapu iti maipagarup a panagimulada iti ebidensia ken unlawful arrest iti drug raid a naisayangkat idiay Manila idi Oktubre 2022.
Segun ti PNP a ti ranggoda ket mangpatalinaed iti professionalism, integrity, ken accountability.
Kinunada a nakasagana ti PNP a makitinnulong iti aniaman nga imbestigasion tapno mapagtalinaed ti panagtalek ti publiko.
Inyanunsiyo met ti PNP spokesperson a ni Police Brig. Gen. Jean Fajardo a dagiti nasao nga illegal nga aktibidad ket saan nga “institutionalized” iti ranggoda.
Inlawlawagna pay a dagiti reward system ket para laeng iti legal a pannakakemmeg dagiti wanted individuals, ken naibasar kadagiti pagannurotan.
Maipalagip a kadagiti 30 a polis a napilaan ti kaso, duapulo ket dua ti aktibo a kameng ti PNP, idinto a dagiti dadduma ket retirado, nagresign, wenno naikkaten iti serbisio, ken dua ti dati a heneral nga agpada a retirado.
