Nagballaag ti Philippine National Police (PNP) kontra iti panagiwaras kadagiti peke wenno daan a ladawan ken video a mangipakpakita iti baro nga epekto iti habagat.
Segun ken ni PNP Chief Gen. Jose Melencio Nartatez Jr., posible nga agresulta iti buteng dagiti makaallilaw a post, kangrunaan ket agtultuloy a marikrikna iti napigsa a tudo ken layos iti sumagmamano a paset idiay Metro Manila ken Luzon.
Kinuna ti PNP chief, adda sumagmamano nga agwarwaras a ladawan ken video a posible a digitally altered wenno ala pay laeng kadagiti napalpalabas a bagyo ken saan a nasayaat a paniempo.
Inallukoy ni Nartatez ti publiko nga i-verify pay laeng dagiti post sakbay nga ibingay, ken nasaysayaat no agbasar laeng iti impormasion kadagiti maseknan nga ahensia iti gobierno ken lokal nga otoridad para iti weather updates, forecast, evacuation advisories ken dadduma pay nga emergency information.
