Nagballaag ti Philippine National Police (PNP) iti publiko kontra ti online scammers a mangididiaya ti tour packages a kasla pudpudno iti baet ti summer travel season.
Dayta iti palagip ni PNP Chief Gen. Rommel Francisco Marbil kasaruno ti pannakakemmeg ti Anti-Cybercrime Group dagiti uppat a pulo ket lima nga indibidual iti cybercrimes manipod April 11 agingga 17 kasaruno iti bilin ni President Ferdinand Marcos Jr. a paingeten ti kampania kontra iti cybercrimes.
Segun ken ni Marbil, allukoyenna iti amin nga iverify dagiti legit a travel agencies ken booking platforms sakbay a makitransaksyon.
Innayonna a target dagiti cybercriminals dagiti inosente nga umili kangrunaan nu dumteng ti peak travel season isu a nabilin ti PNP nga agbalin nga aktibo iti panagmonitor, panagpatrolya ke panagsagana nga agtignay ta awan iti paglugaran a natalged dagiti scammer iti digital world.
Insayangkat ti PNP-ACG iti 313 cyber patrolling activities ken 13 digital forensic examinations manipod April 11 agingga 17 a gappuanan ti pannakakemmeg iti uppat a pulo ket lima pakairamanan iti tallopulo ket dua a tattao babaen ti entrapment operations.
