Mangideploy ti Philippine National Police iti nasurok 54,000 a kameng dagiti pulis ken force multipliers iti intero a pagilian kas paset iti seguridad para iti umadani a summer vacation period.
Segun ken ni PNP Directorate for Operations’ public safety division chief Police Colonel Anna Liza Macapinlac, mangrugi ti deployment inton Marso 29 agingga Mayo 31.
Gagem ti Oplan Summer Vacation 2026 ti PNP a siguradwen ti kinatalged dagiti agindeg, biyahero, ken turista a manamnama a mapan kadagiti pagbakasionan iti pagilian.
Maimuntar dagiti motorist assistance centers, police assistance desks, ken tourist police assistance kadagiti major travel routes.
Kabayatanna, nabilin ti Anti-Cybercrime Group a papigsaenda ti cyber patrol ken information campaign kontra iti peke a travel offer, fraudulent online bookings, ken dadduma pay a travel-related scam.
