Nagpanawagan ti Philippine National Police kadagiti lokal a gobierno ti pagilian a mangipan iti firecracker zone iti lugarda tapno masigurado ti kinatalged ti publiko gapu iti manamnama a panagpaputok ita a Paskua ken Baro a Tawen.
Dayta ket kalpasan a mainspeksion dagiti paglakoan iti paputok idiay Bocaue, Bulacan.
Nainget a maipatpatungpal ti safety standards ti Firearms and Explosives Office, ket kasapulan nga adda valid permit dagiti amin a paglakoan iti paputok, husto nga storage, ken nalawag a label.
Nainget a maiparit ti panagilako iti iligal, dakkel ken nadagsen unay, imported, ken awan naganna a paputok.
Nabilin dagiti lokal a kapulisan a pabilgen ti kampaniada kontra kadagiti iligal a paputok ta asino man nga aglabsing ket sumango iti pannusa.
