Inallukoy dagiti dadduma a kongresista ti Philippine National Police a kitaen a naimbag ti mental fitness dagiti kamengda gapu iti nakaro a pungtot nga impakita ti maysa a pulis iti pannakakemmeg ni dati a Presidente Rodrigo Duterte.
Ti apela ket inaramid da House Assistant Majority Leader Zia Alonto Adiong ken Deputy Majority Leader Paolo Ortega kas reaksyon iti pungtot nga impakita ni Patrolman Francis Steve Fontillas ti Quezon City Police District iti vlog-na.
Kiddaw ni Ortega a kanayon a panunoten ti PNP, National Police Commission, ken Armed Forces of the Philippines agraman dagiti kapadada nga ahensia, a saan laeng a pisikal a kabaelan dagiti baro a pulis no di ket uray ti mental a sasaadenda.
Segun ken ni Adiong, ti nakitana iti vlog ni Fontillas ket kasla adda paglaslasatanna.
