Impasigurado ti Philippine National Police nga adda nakasagana a “support mechanism” para kadagiti Pilipino nga agkasapulan iti tulong iti baet ti agtultuloy a riribuk iti Middle East.
Iti flag raising ceremony, pinasingkedan ni PNP Chief Gen. Jose Melencio Nartatez Jr. nga agtultuloy nga imonmonitor ti PNP ti sitwasion iti rehion ken ita ket awan pay ti nabigbig a pangta ditoy pagilian.
Nakaalerto latta ti kapulisan ken agtultuloy a maipatpatungpal ti standard security measures kadua dagiti dadduma pay nga ahensia ti gobierno tapno masigurado ti kinasagana iti ania man a posible a sitwasion.
Immunan a nangideploy ti Special Investigation Team ti CIDG tapno tumulong iti koordinasion para iti natalged ken naurnos a repatriation dagiti Pilipino a mabalin a maapektaran iti riribuk iti sabali a pagilian.
