Im-imbestigaran itan ti Philippine National Police (PNP) ti kinapudno iti alegasion nga agi-sagsagut ni Kingdom of Jesus Jesus Christ (KOJC) Leader Apollo Quiboloy kadagiti babbai a miembro kadagiti gagayyemna.
Segun ken ni Chief PCol. Jean Fajardo manipud idi nakemmeg ni Quiboloy, adu ti immasideg kadakuada tapno ibingayda ti kapadasanda iti sidong ni Quiboloy.
Innayon pay ni Fajardo nga addan ti iyal-alaanda iti statement manipud kadagiti biktima ken proseso ti panangidokumentoda kadagiti ebidensia tapno mapilaan ti kaso dagiti naglabsing iti linteg uray ania ti kasasaadda iti biag.
Iggem pay dagiti polis ti maysa kadagiti mapapati a dati a kameng ti ‘Angels of Death’ ni Quiboloy a nakaalaanda met iti statement.
Kinuna ni Fajardo a nadagsen ti nadakamat nga alegasion ken qualified human trafficking ken sex trafficking a non-bailable case.
Immapela ti PNP dagiti posible a biktima ti pannakamolestia ni Quiboloy nga umsidegda iti polis ken inkarina a maipaayan dagitoy iti proteksion.
