Im-imbestigaran ti Philippine National Police dagiti aktibo ken retirado a police officer a posible a tumultulong ken ni Atong Ang tapno makalibas kadagiti kaso a kriminal a sangsangwenna gapu kadagiti mapukpukaw a mannadi.
Segun ken ni PNP spokesman Brig. Gen Randulf Tuaño, awan ti opisial a nakadutok a police security details ken Ang isu a kitkitaen dagiti otoridad ti posibilidad ti proteksion ni Ang no manipud kadagiti private guards.
Karaman kadagiti kitkitaen ti Criminal Investigation and Detection Group a tumultulong ken ni Ang ket dagiti “seasoned police officers”.
Imbilin met ni PNP Chief Melencio Nartatez Jr. ti panagadal ti posible a panangipila kadagiti kaso nga administratibo ken kriminal kontra kadagiti aktibo ken retirado a pulis a mapaneknekan a tumoltulong iti pugante.
