Iggemen ti Philippine National Police ti dua a maibilang a ‘missing link’ iti kaso dagiti mapukpukaw a sabungero, nga agpada a kabsat ti whistleblower a ni Julie Patidongan, alyas Totoy.
Nabigbig dagitoy a da Elakim Patidongan ken ni Jose Patidongan.
Segun ken ni PNP Spokesperson PBGen. Jean Fajardo, ni Elakim ti mapapati a nag-withdraw iti kuarta manipud iti ATM account ti maysa kadagiti biktima, idinto a ni Jose ket naalaan iti video a nangescort iti maysa pay a mapukpukaw a sabungero.
Natiliw dagiti dua iti maysa a pagilian iti Southeast Asia ken naipasubli ditoy pagilian idi July 22.
Adda warrant of arrest ni Jose iti kaso a robbery, idinto a ni Elakim ket nakemmeg gapu iti panagaramatna iti peke a nagan iti pasaportena kas ‘Robert Baylon’.
