VIGAN CITY – Pagik-ikkaten ni Buhay Partylist Rep. Lito Atienza iti puwesto ni Philippine National Police Chief Oscar Albayalde nu saan a tumulong iti imbestigasyon kontra kadagiti kameng ti PNP a mapapati nga agirec-recycle iti iligal a droga a maala da kadagiti operasyon nga iwaywayat da.
Ti pannaki-uman ti Bombo Radyo Vigan ken ni Atienza, nadakamat na a nu makipinnatangken ni Albayalde ken ipapilit na a saan na nga ammo dagiti nadakamat ni dati a Criminal Investigation and Detection Group (CIDG) Chief – agdama a Baguio City Mayor Benjamin Magalong iti panagdengngeg ti Senado idi naminsan nga aldaw, nasaysayaat laengen nga agikkat iti puwesto ti PNP Chief tapnu saan nga agturay kas syndicated criminal organization ti PNP.
Dayta ket adda pakainaigan na iti naisayangkat a raid idiay Mexico, Pampanga idi 2013 nga isu pay iti nakasuspensoan idi ni Albayalde ta isu iti nakatugaw kas provincial director ti Pampanga.
Segun ken ni Atienza, nu ibutaktak ti PNP chief dagiti ammo na inaig iti nasao a banag, dakkel iti maitulong na iti pannakasolbar iti nasao nga isyu ken pannakadusa dagiti maibilang a ninja cops.
