VIGAN CITY – Naiyalis idiay Asian Hospital manipud San Pedro General Hospital da Philippine National Police (PNP) chief Gen. Archie Francisco Gamboa ken dagiti innem a kakadua na a naglugan iti nagsuwek a chopper idiay San Pedro, Laguna.
Segun ken ni Police Major General Guillermo Eleazar a mangidaulo ti PNP Directorial Staff, natalgeden iti kasasaad ni Gamboa ken dagiti kakadua na a naglugan iti nasao a chopper ta naitaray da iti kaasitgan nga ospital para iti pannakataming da.
Kadua ni Gamboa a naglugan iti nasao a chopper da Lt. Gen. Jovic Ramos, Lt. Gen Marielle Magaway kenni PNP Spokesman Brig. Gen. Bernard Banac.
Maibasar iti inisyal nga impormasyon, naisab-it iti rotor blade ti chopper a nagluganan da Gamboa iti live wire ti MERALCO idi ag-take-off gapu iti dust zero visibility ket nagsuwek.
Agsipud iti dayta, naisina ti rotor blades iti nasao a chopper ket simged pay.
Mapan kuma idiay Camp Vicente Lim para ti command visit ti Police Regional Office – 4A ni Gamboa a naggapu idiay Laperal Compound idiay San Pedro, Laguna idi napasamak iti aksidente.
