Agsagsagana ti Philippine National Police ken ad-adalenda ti posible a ‘threat group’ kas paset iti panagsaganada para iti anti-corruption protest inton Nobiembre 30.
Segun ken ni Acting PNP Chief Lt. Gen. Jose Melencio Nartatez Jr., mangal-alan ti PNP iti impormasion mainaig iti kinaadu dagiti dumar-ay, lugar ti rally, ken dagiti grupo a nasken a bantayan tapno makabukel iti solido a plano.
Maipaay a nasayaat ti puersa ken maliklikan ti kinaranggas kas ti napasamak iti protesta idi September 21 a nangitunda iti dua a pannakatay ken nasurok 200 ti nakemmeg, agraman dagiti 90 a menor de edad.
Pinasingkedan dagiti Trillion Peso March organizer a mapasamak manen ti protesta inton November 30, kagiddan ti panagkasangay ni Andres Bonifacio, tapno maituloy ti kampania kontra kadagiti anomalya iti flood control ken dadduma pay nga infrastructure project.
