Mangisayangkat iti panagadal ti Philippine National Police (PNP) maipanggep ti posible nga integration dagiti electric vehicle (EV) a lugan dagiti pulis kasaruno iti amak iti agtultuloy a panagpangina iti presyo ken posible a pannakataktak iti suplay dagiti produkto petrolyo.
Segun ken ni PNP Chief General Jose Melencio Nartatez Jr., ti riribok idiay Middle East ket posible a makaapektar iti suplay dagiti produkto petrolyo ken agresulta iti panagpangato iti operational expenses.
Inlawlawag ni Nartatez a tunggal panagpangato ti presyo dagiti produkto petrolyo ket katukad iti nayon a gastos iti operasyon iti tunggal unit iti kapulisan.
Immunan a nagballaag dagiti eksperto iti nabayagen a riribok idiay Middle East ket makaapektar iti langis iti intero a lubong ken posible nga agresulta iti panag-ngina ti presyona.
Bayat nga ad-adalenda iti panagaramat kadagiti electric vehicle ket impaganetget ti hepe ti PNP a saan a rumbeng a makompromiso iti inaldaw-aldaw a pagkasapulan iti operasyon iti pulisya pakairamanan iti napaspas ken mapangnamnamaan a panagtignay iti kasapulan.
