Nangbukelen ti Philippine National Police Anti-Cybercrime Group iti grupo a mangbantay iti imbestigasion ti nagwaras a peke a medical records ni Presidente Ferdinand Marcos Jr.
Segun ken ni PNP-ACG Director Brig. Gen Wilson Asueta, dinutokannan ti grupo a makitinnulong kadagiti sabali pay nga ahensia a responsable iti imbestigasion.
Nagkedked met ni Asueta a mangted iti nayon a detalye wenno nagan dagiti maim-imbestigaran gapu iti agtultuloy nga imbestigasion.
Immunan a pinaglibakan ti Malakanyang ken ti St. Luke’s Medical Center iti dokumento a nagwaras mainaig iti salun-at ti presidente.
Posible a sumango dagiti responsable iti panaglabsing iti Article 154 ti Revised Penal Code, a ti sakupna ket ti “unlawful use of means of publication and unlawful utterances” ken iti panagaramat iti peke a dokumento iti salinong ti Article 172.
