Nagpalagip ti Philippine National Police Anti-Cybercrime Group kangrunaan kadagiti agayan-ayat a pagtalinaeden a pribado dagiti sexual activity da kalpasan ti pannakakemmeg ti maysa a transgender woman a nangiwaras iti lamu-lamo a video ken ladawanda iti dati a nobiona.
Segun ken ni PNP-ACG Spokesperson Lt. Warren Arancillo, ngimmato ti kaso ti krimen nga adda kainaiganna iti panangala ken panagiwaras kadagiti lamu-lamo a ladawan ken video ta manipud Enero uno agingga Agosto 15 ita a tawen, dua gasut tallopulo ket walo dagiti kaso a mainaig iti crime of photo and video voyeurism.
Nangatngato ngem iti dua gasut ket siam a nairekord iti isu met laeng a panawen idi napan a tawen.
Masansan a pagtataudan dagiti krimen ket ti nalabes nga ayat a mangitunda no dadduma iti panagpinnatulod iti tunggal maysa kadagiti sensitibo a ladawan ken video ket no agsina, maar-aramat a pangblackmail wenno pammutbuteng.
