Imbilinen ti Department of Energy (DOE) ti Philippine National Oil Company (PNOC) tapno gumatang ti saan a bumaba a maysa a milyon a bariles ti diesel kas reserve supply ti gobierno iti baet ti agtultuloy a panagngato ti presio ti langis ken buteng iti world market.
Segun ken ni Director Rino Abad ti Oil Industry Management Bureau (OIMB-DOE), direktiba daytoy ni DOE Secretary Sharon Garin tapno masigurado ti naan-anay a suplay ti diesel a mausar iti pagilian.
Inlawlawag ni Abad nga usaren ti PNOC ti bukod da a pondo para iti panaggatang ti reserba a diesel ken mailako daytoy kadagiti kompania ti langis nga awan ti patong-na isu a saan a manamnama ti panagngato ti presio iti merkado.
Target ti gobierno a makagatang ti suplay manipud ti sabali a pagilian kas ti South Korea, Japan, Singapore, Malaysia, Indonesia, ken Canada a manamnama a mang-nayon iti seguridad ti suplay ti Pilipinas.
