VIGAN CITY – Inbalakad ni Santiago Ngacio, apong ni Ens. Dionne Mae Umalla a topnotcher ti PMA Mabalasik Class of 2019, a saan na a tuladen dagiti dadduma a nagturpos iti akademiya a sumangsango itatta iti naduma-duma a klase iti kontrobersiya ta arigna saan dan nga inyaplikar dagiti nasursuro da iti uneg ti PMA.
Segun ken ni Ngacio, masapul a pagtalinaeden ni Umalla iti kinapakumbaba na ken ti kinalaing na ta patien na nga ad-adayon to pay iti madanun na ken ad-adun to pay a balligi iti magun-od na.
Nangruna nga innaganan ti dati a municipal agriculture officer ti Alilem ni Sen. Antonio Trillanes IV a saan a tuladen ti balasang tapnu saan a mairaman iti naduma—duma a kontrobersiya.
Kabayatanna, adda met ti balakad ni Umalla kadagiti kailyan na idiay Alilem ken dagiti agtutubo.
Ti panagsarita na idi kalman, naibaga na a masapul a padasen dagiti adu nga oportunidad a sumangbay ket nu man agkamali, tumakder ket ituloy manen iti manggun-od iti arapaap.
Ens. Dionne Mae Umalla- PMA MABALASIK Class of 2019 Valedictorian
Napalaus iti ragsak ni Mayor Mar Ruel Sumabat gapu ti pammigbig a naipaay ni Umalla iti ili da ng Alilem ket iti panagsarita na, naibaga na a nagasat ti ili da ta nakapatanur da ti PMA Topnotcher a manmanu a mapasamak wennu sumangbay iti maysa a lugar.
