Pormalen a nagtugaw kas officer-in-charge ti Philippine National Police Officer-in-Charge (PNP OIC) Chief ni PLtGen. Melencio Nartatez.
Segun ken ni Department of the Interior and Local Government (DILG) Secretary Jonvic Remulla, saanna nga inrekomenda ni PLtGen. Nartatez ken ni Presidente Ferdinand R. Marcos, Jr., ken mapapati nga awan ti naglabsingan ni PGen. Nicolas Torre III kalpasan ti panakaikkatna kas mangidaulo iti PNP.
Inlawlawag ni Remulla nga ikonkonsiderar ti presidente nga ipaayan iti puesto iti gobierno ti dati a hepe ti PNP kagiddan ti panangibagana a saan a mainaig iti pulitika ti pannakaikkat ni Torre.
Dua ti pagpilpilian ita ni dati a hepe ti PNP – ag-early retirement wenno agtalinaed iti puesto.
Impasigurado met ni PNP OIC Chief PLtGen. Nartatez nga ituloyna dagiti nasasayaat a proyekto ken programa ti ahensia.
