Maysa a transparent plastic pack ti mapapati a shabu ti nasarakan dagiti dua a mangngalap idiay Sitio Quimmarayan, Barangay Caterman, Candon City, Ilocos Sur.
Dagiti mangngalap ket da Domingo Gaoat Ramos, agtawen iti innem a pulo ket innem ken ni Edwin Valdez Gaoat, agtawen iti uppat a pulo ket siam, agpada nga agnaed iti nasao a lugar.
Nakaawat dagiti kameng ti Candon City Police Station iti tawag manipud ken ni Ramos a mangipakpakaammo iti nasarakanda a maysa anga aqua blue plastic pack a naglaon iti mapapati a shabu iti nasao a barangay.
Dagus a nagresponde dagiti pannakabagi ti linteg ket maibasar iti imbestigasyon, alas kuatro iti malem idi napan nagkalap dagiti mangngalap usar ti motorized banca da ket nadlawda nga adda maysa a plastic nga adda Chinese markings na ti tumtumpaw iti kabaybayan, nasurok kumurang sangapulo ket uppat a milya iti siudad ti Candon.
Linuktan dagiti mangngalap iti pakete ket natakuatanda a daytoy ket crystalline substance isu nga idi nakaawidda ket dagus met nga impaimada kadagiti pannakabagi ti linteg.
