VIGAN CITY- Saan a napnek ti grupo dagiti mangmangged iti naawat dagiti empleyado iti panagsara ti green leaf threshing plant ti Philip Morris Fortune Tobacco Corporation Incorporated ditoy syudad ti Vigan ta kasapulan nga agbayad ti kompanya ti danyos gapu iti kellaat a panagsara na
Segun kenni Charito Villaflor, electrical technician ti planta ken presidente ti grupo dagiti mangmangged, saan a naipakaammo kadakuada ti panagsara ti planta ta bigla lattan nga inted ti kompanya ti sweldo dagiti empleyado depende iti tawen iti panagserbi da ken adda ti pinapermaan da tapno makaawat da iti sangagasut a ribo a pisos.
Ita nga aldaw ket mangipila ti notice of strike idiay Department Of Labor And Employment ti mother unit ti labor union ti PMFTC idiay Marikina gapu ta nasurok dwa gasut met nga empleyado ti planta ti nagulpe a naikkat idiay Marikina.
Atapen ni Villaflor a binayadan ti management dagiti empleyado ta inton umay a tawen ket maisayangkat ti collective bargaining agreement ta plano da kuma a kiddawen a maipangato ti sweldo.
Immunan a pinatalgedan ti PMFTC iti panagsara ti planta da ditoy syudad ti Vigan gapu iti pannakalugi nga epekto ti pannakaipangato ti excise tax idi 2013 ken bimmaba iti uppat a pulo a porsyento ti produksyon ti planta ditoy Vigan ,kagiddan iti panangipasigurado ti kompanya a maited iti umno a tulong para kadagiti apektado nga empleyado iti separation packages ken dadduma pay a programa.
