VIGAN CITY – Dua gasut innem a pulo ket maysa a tray iti itlog nga aggatad iti pitopulo a ribo a pisos iti naala kadagiti lallaki a nasalamaan iti Animal Quarantine Checkpoint idiay Brgy. Gabur, Sta. Cruz idi kalman.
Panaglabsing iti Provincial Ordinance No.15-16, Series of 2015 section 4 para, B&J iti sanguen ti nagmaneho iti Mitsubishi Canter Aluminum Truck Van a ni Allison Kim Catingco Estialbo, agtawen ti duapulo ket pito, baro, driver; Roberto Umipig Solo Jr., agtawen ti duapulo ket innem ken Ryan Curay Sarmiento, agtawen ti sangapulo ket walo, baro nga agpapada nga agnaed idiay 133 Lucao District, Dagupan City, Pangasinan ta awan iti shipping permitda ken napaayda iti panang-submit iti produktoda pakairamanan ti bagida para iti inspection.
Gapu iti dayta ket addan ti kostudiya iti Animal Quarantine Personnel dagiti nasalamaan ken pakairamananen ti lugan ken linaonna tapno dumalan iti husto a proseso.
Kabayatanna, ginandat a suhulan ti dua a lalaki ti maysa a pulis iti Animal Quarantine Checkpoint iti nasao met laeng a lugar.
Nabigbig dagiti nanggandat a nagsuhol ti pulis a da Apolonio Nicoals Reyes, agtawe ti limapulo, naasawaan, driver nga agnaed iti Pulong Buhangin, Sta. Maria, Bulacan a nagmaneho iti Isuzu Van truck ken pasaherona a ni Julius Mariano Vicente, agtawen ti uppat a pulo ket dua, baro nga agnaed iti 0555 Turo Bocaue, Bulacan.
Maibasar iti inisyal nga imbestigasyon, pinara dagiti personnel iti Quarantine checkpoint ti naglugananda ken dinamagda iti karga iti luganda ket pinasingkedanda nga itlog iti linaonna.
Ininspeksyon dagiti pannakabagi ti linteg iti van ket naduktalanda a naglaon iti nadumaduma a klase iti paputok isu a boluntaryo nga impakita ti driver iti Permit to Transport iti paputok ngem ginandatnan a suhulan iti ti pulis iti gatad a limaribo a pisos a gappuanan iti pannakakemmegda.
Gapu iti dayta maisagsaganan iti kaso a maipal kontra kadakuada
