VIGAN CITY – Uppat a pulo a kilo ti marinated chicken ken tallopulo a kilo ti beef sisig a maideliver koma kadagiti agnegnegosyo ditoy probinsia, Abra ken idiay Ilocos Norte ti nasalamaan dagiti agbambantay iti animal quarantine checkpoint idiay Brgy. Gabur, Sta. Cruz.
Ti nakaikargaan a lugan dagiti meat products ket minaneho ni Jayson Gabinete, agtawen iti uppat a pulo a taga 36 A Capaos St. Masambong, Quezon City.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano, namueltan ti nasao a drayber gapu ta saan a nagpa-inspeksion iti checkpoint ken saan nga accredited ti luganna nga agipastrek kadagiti nasao a produkto.
Nupay kasta, naipanen iti Provincial Veterinary Office,Vigan City tapno maidalan iti husto a proseso.
