VIGAN CITY – Pito ti nakemmeg a nagsusugal iti naiwayat nga anti-illegal gambling operation idiay Barangay San Jose, Vigan City.
Dagiti nagsusugal iti Table 1 ket da Eliseo Usana Allagadan, agtawen iti limapulo ket innem, tricycle driver, taga-Barangay Cabaroan Daya, Vigan City; Reynold Garcia Talape, sales boy, agtawen iti uppat a pulo ket maysa, taga-Barangay Fatima, Vigan City ken ni Nelia Flores Arcena, agtawen iti innem a pulo ket tallo, taga-Barangay San Jose, Vigan City.
Iti met table 2 ket da Wilfredo Patubo Alcantara, agtawen iti limapulo ket siam, taga-Barangay Nagsangalan, Vigan City; Zenaida Ilaga Paroligan, agtawen iti innem a pulo ket dua, taga-San Julian Sur, Vigan City; Perlita Pagalanan Galvan, agtawen iti limapulo ket tallo; ken ni Juvy Fieldad Cachola, agtawen iti tallopulo ket walo, taga-Barangay San Jose, Vigan City.
Naaktuan dagiti suspek nga agaayam iti tong-its ken pusoy dos.
Naala manipud iti table 1 ti dua a set ti baraha ken pusta nga PHP885 idinto nga iti table 2 ket maysa a set ti baraha ken pusta a PHP476.
Sangwen dagiti suspek ti kaso a panaglabsing iti Presidential Decree 1602 wenno Anti-Illegal Gambling Act.
